خواب پر اشعار

دنیا ہے خواب حاصل دنیا خیال ہے

انسان خواب دیکھ رہا ہے خیال میں

میں ہوں ایک عاشق بے نوا تو نواز اپنے پیام سے

یہ تری رضا پہ تری خوشی تو پکار لے کسی نام سے

جگا کر خواب آسائش سے بیدارؔ آہ ہستی میں

عدم آسود گاں کو لا کے ڈالا ہے تباہی میں

کس کو سناؤں کس سے کہوں ماجرائے غم

گونگے کا خواب ہے یہ مری داستاں نہیں

عید سے بھی کہیں بڑھ کر ہے خوشی عالم میں

جب سے مشہور ہوئی ہے خبر آمد یار

قفس میں بھی وہی خواب پریشاں دیکھتا ہوں میں

کہ جیسے بجلیوں کی رو فلک سے آشیاں تک ہے

اب خواب میں بھی دید کو آنکھیں ترس گئیں

بے خواب کر دیا غم شب زندادار نے

کچھ خبر ہے تجھ کو اے آسودۂ خواب لحد

شب جو تیری یاد میں ہم تا سحر رویا کئے

دہر فانی میں ہنسی کیسی خوشی کیا چیز ہے

رونے آئے تھے یہاں دو چار دن کو رو گئے

زندگی جس میں سانس لیتی تھی

وہ زمانہ خیال و خواب ہے آج

اس قدر یاد ہے بس عشق کی روداد حیاتؔ

جیسے دیکھا تھا کبھی خواب پریشاں کوئی

تیرے در سے نہ اٹھا ہوں نہ اٹھوں گا اے دوست

زندگی تیرے بنا خواب ہے افسانہ ہے

عارفاؔ میں خواب غفلت میں رہا جب بے خبر

جاگ کر میں نے سنا دلبر پیارا پھر گیا

حال دل ہے کوئی خواب آور فسانہ تو نہیں

نیند ابھی سے تم کو اے یاران محفل آ گئی

اے عرشؔ آؤ خاک میں دلی کے سو رہیں

مٹ کر بھی خواب گاہ یہ اہل ہنر کی ہے

میری یقیں نہ ہو تو ستاروں سے پوچھنا

بے خواب چاندنی بھی رہی تیری یاد میں

آج تو قیصرؔ حزیں زیست کی راہ مل گئی

آ کے خیال و خواب میں شکل دکھا گیا کوئی

خدا جانے تھا خواب میں کیا سماں

ارے درد دل کیوں جگایا مجھے

آگ لگی وہ عشق کی سر سے میں پاؤں تک جلا

فرط خوشی سے دل مرا کہنے لگا جو ہو سو ہو

غم جاناں سے دل مانوس جب سے ہو گیا مجھ کو

ہنسی اچھی نہیں لگتی خوشی اچھی نہیں لگتی

کیا کہوں تجھ سے اب کے میں تجھ کو

کس طرح دیکھتا ہوں خواب کے بیچ

کاہکشاں کے خواب مظفرؔ دیکھ رہا تھا

اور بیداری ریت کے ٹیلے پر لے آئی

جاگتے کا خواب سمجھو ورنہ دنیا ہے بھی کیا

اس کی حسرت ہے بھی کیا اس کی تمنا ہے بھی کیا

ان کو دعویٰ یوسفی آسیؔ

خواب میں بھی جو آ نہیں سکتے

بیداری ہو یا خواب ہو ہر حال میں ہے وصل

جو صاحب نسبت ہیں مگر اہل یقیں ہیں

ہے عالم خواب حال دنیا

دیکھے گا جو چشم وا کرے گا

رات کو بے خبر رہے آپ تو خواب ناز میں

نیند نہ آئی صبح تک ہم کو شب دراز میں

کوئی لائے اس کو ذرا ہوش میں

یہ واعظ ہے کس خواب خرگوش میں

جب آگ دھدکتی ہو اس پر مت چھیٹیو تیل خدا را تم

کیا دل کی خوشی کو پوچھو ہو اے یارو اک ناشاد ستی

کچھ فکر تمہیں عقبیٰ کی نہیں احقرؔ یہ بڑی نادانی ہے

دنیا کی خوشی کیا ایذا کیا یہ حادث ہے وہ فانی ہے

اس سیہ بخت کی راتیں بھی کوئی راتیں ہیں

خواب راحت بھی جسے خواب پریشاں ہو جائے

کہاں چین خواب عدم میں تھا نہ تھا زلف یار کا خیال

سو جگا کے شور نے مجھے اس بلا میں پھنسا دیا

خواب ہے نہ بیداری شکر ہے نہ ہوشیاری

لطف لذت کیف بے خمار مجھ سے پوچھ

کیا مری آنکھ عدم بیچ لگی تھی اے چرخ

کیا اس خواب سے تو نے مجھے بیدار عبث

پل بھی ہے فخر جونپور آسیؔ

خواب گاہ جناب شیخو ہے

نہ فقط یار بن شراب ہے تلخ

عیش و آرام و خورد و خواب ہے تلخ

مجھ سے نہ اب حقیقت تعبیر پوچھئے

وصل صنم کے نقش نظر آئے خواب میں

شمع کے جلوہ بھی یارب کیا خواب تھا جلنے والوں کا

صبح جو دیکھا محفل میں پروانہ ہی پروانہ تھا

جوں مثال اس کی نمودار ہوئی توں ہی بیاںؔ

طپش دل نے کیا خواب سے بیدار مجھے

دل ہے بیتاب چشم ہے بے خواب

جان بیدارؔ کیا کروں تجھ بن

رات بھر پھرتا تھا کنعاں میں زلیخا کا خیال

مصر کو یوسف چلے اس خواب کی تعبیر کو

اے زہے طالعے بیدار کہ ہم خواب ہے وہ

میں تو اس رات کو سمجھا ہوں، کرامات کی رات

نیند آوے گی نہ تنہا بیدارؔ

تا نہ خواب اس سے بہم کیجئے گا

خوشی ہے زاہد کی ورنہ ساقی خیال توبہ رہے گا کب تک

کہ تیرا رند خراب افقرؔ ولی نہیں پارسا نہیں ہے

میرا بخت خوابیدہ بیدار ہو

تیرا خواب میں مجھ کو دیدار ہو

مت کہو مجھ سیں قصۂ فرہاد

خواب شیریں میں آج سوتا ہوں،

مسند کم خواب شاہاں کو کہاں حاصل یہ قدر

منزلت تیرے گداؤں کی جو خاکستر میں ہے

بد مزاجی ناخوشی آزردگی کس واسطے

گر برے ہم ہیں تو ہو جئے اور سے جا آشنا