تو سورت نہیں نہار وہ انڈ میں سارا ہے

تو اس کی صورت اپنی آنکھوں میں بسا لے اور دیکھ کہ یہ دنیا اس کے وجود سے بھری ہوئی ہے۔ دل میں سوچ تو معلوم ہوگا کہ یہ سارا دیس تیرا اپنا ہے۔ جس دن ست گرو کے درشن ہوں گے اس دن عشق جاگ اٹھے گا، تعلق اور بے تعلقی کے سارے راز کھل جائیں گےاور تب محسوس ہوگا کہ وہ (اس دنیا میں ہوتے ہوئے بھی) اس دنیا سے ماورا ہے۔ یہ جگت سب کی نگری ہے، اس کی ٹیڑھی بانکی پگڈنڈیاں دلکش ہیں۔ یہ کیسا عجیب کھیل ہے کہ ان راہوں پر قدم رکھے بغیر ہی چلنے والے منزل پر پہنچ جاتے ہیں۔

وہاں سکھ کا کھیل مسلسل جاری ہے اور سعادت اور مسرت ابدی ہے۔ یہ مل جائے تو دنیا کا سارا کھونا اور پانا بے معنی ہے۔ (حاصل کرنے کی جدو جہد اور تج دینے کی لذت ختم ہو جاتی ہے) وہی لا محدود نروان ہے۔ اسی سے ساری کائنات میں عشق (سُرت) کا ظہور ہے۔ ذاتِ حق (ست پُرُش) سے نئے نئے اجسام کے دھارے بہہ رہے ہیں اور ہر روپ میں اسی (صاحب) کی شکل دکھائی دے رہی ہے۔ باغ مہک رہے ہیں اور پھلواریاں کھلی ہوئی ہیں۔ امرت کی لہریں جاری ہیں۔ وہاں ہنس (روح) خوش ہو کر ناچ رہا ہے اور لا محدود نغمے کے بادل چھائے ہوئے ہیں۔ اس کے بیچ میں وہ سنگھاسن معلق ہے جس پر مہاپُرُش (ذاتِ پاک) براجمان ہے اور اس کا دیدار ایسا دلکش ہے کہ اس کے ایک بال کی روشنی سے لاکھوں سورج شرما جاتے ہیں۔

کوئی راہ نہیں ہے پھر بھی صوتِ سرمدی گونج رہی ہے جو دل میں اتر جاتی ہے۔ جنم جنم کا امرت دھارا بہہ رہا ہے اور ابدیت کا پھوار پڑ رہی ہے۔ وہ جسے شونیہ (خلا) سمجھا جاتا ہے وہی سب سے بڑی صداقت ہے اور تمام صداقتیں اسی میں محو ہیں۔ دانش اور فلسفے کی رسائی سے در اس کے وجود میں تخلیق کا کھیل جاری ہے جو خود سب سے نیارا ہے۔ بھائی وہ احدیت (یکتائی) کی دنیا ہے جس کے مالک (پُرُش) کا کوئی نام نہیں ہے۔ کوئی بیان نہیں ہے، جو وہاں پہونچے گا وہی جائے گا، کہنے سننے کی کوئی گنجائش نہیں ہے۔ وہاں روپ سروپ کچھ نہیں ہے۔ کوئی مقام دکھائی نہیں دیتا۔ عرض و طول کچھ نظر نہیں آتا۔ پھر کیسے کہوں کہ اس کا شمار کیا جا سکتا ہے۔ جس پر معبود (سائیں) کی عنایت ہے وہی صوتِ سرمدی کا راز پا سکتا ہے۔ جسے اس کا دیدار ہو گیا اس کے لیے ازل اور ابد سے معنی ہیں۔ کبیر کہتے ہیں کہ اس کا بیان زبان سے نہیں کیا جا سکتا، کاغذ پر لکھا نہیں جا سکتا، یہ ایسا ہی ہے جیسے گونگے نے گڑ کھایا ہو، اس کا ذائقہ کیسے بیان ہو سکتا ہے۔

(ترجمہ: سردار جعفری)