udhar tere aañsū idhar mere aañsū

vo laa.e hue haiñ yā aa.e hue haiñ

udhar tere aansu idhar mere aansu

wo lae hue hain ya aae hue hain

jo kuchh bhī ḳhushī se hotā hai ye dil kā bojh nā ban jaa.e

paimān-e-vafā bhī rahne do sab jhūTī bāteñ hotī haiñ

jo kuchh bhi KHushi se hota hai ye dil ka bojh na ban jae

paiman-e-wafa bhi rahne do sab jhuTi baaten hoti hain

hañsne meñ jo aañsū aate haiñ nairañg-e-jahāñ batlāte haiñ

har-ros janāze jaate haiñ har-ros brāteñ hotī haiñ

hansne mein jo aansu aate hain nairang-e-jahan batlate hain

har-ros janaze jate hain har-ros braaten hoti hain

qismat jaage to ham so.eñ qismat so.e to ham jāgeñ

donoñ hī ko niiñd aa.e jis meñ kab aisī rāteñ hotī haiñ

qismat jage to hum soen qismat soe to hum jagen

donon hi ko nind aae jis mein kab aisi raaten hoti hain

āshob-e-judā.ī kyā kahiye anhonī bāteñ hotī haiñ

āñkhoñ meñ añdherā chhātā hai jab ujyālī rāteñ hotī haiñ

aashob-e-judai kya kahiye anhoni baaten hoti hain

aankhon mein andhera chhata hai jab ujyali raaten hoti hain