خدا پر اشعار

عشق کی ابتدا بھی تم حسن کی انتہا بھی تم

رہنے دو راز کھل گیا بندے بھی تم خدا بھی تم

بطفیل دامن مرتضی میں بتاؤں کیا مجھے کیا ملا

کہ علی ملے تو نبی ملے جو نبی ملے تو خدا ملا

کام کچھ تیرے بھی ہوتے تیری مرضی کے خلاف

ہاں مگر میرے خدا تیرا خدا کوئی نہیں

آؤ اک سجدہ کریں عالم مدہوشی میں

لوگ کہتے ہیں کہ ساغرؔ کو خدا یاد نہیں

مری تربت پہ خود ساقی نے آ کر یہ دعا مانگی

خدا بخشے بہت اچھی گزاری مے پرستی میں

خدا سے ترا چاہنا چاہتا ہوں

میرا چاہنا دیکھ کیا چاہتا ہوں

تم خفا ہو تو اچھا خفا ہو

اے بتو کیا کسی کے خدا ہو

مجھ کو خدا سے آشنا کوئی بھلا کرے گا کیا

میں تو صنم پرست ہوں میرا کوئی خدا نہیں

تم سلامت رہو قیامت تک

اور قیامت خدا کرے کہ نہ ہو

تم مرے رونے پے ہنستے ہو خدا ہنستا رکھے

یہ بھی کیا کم ہے کہ رو کر تو ہنسا سکتا ہوں، میں

ایازؔ اک بیش قیمت سا تجھے نکتہ بتاتا ہوں

تم اپنے آپ کو سمجھو خدا کیا ہے خدا جانے

تو کو بتاؤں سن رے سکھی ری مرشد پیا کی صورت کس کی

یہی ہے صورت شیر خدا کی بانکی چتون کاری اکھیاں

خیال یار سلامت تجھے خدا رکھے

ترے بغیر کبھی گھر میں روشنی نہ ہوئی

محبت بت کدے میں چل کے اس کا فیصلہ کر دے

خدا میرا خدا ہے یا یہ مورت ہے خدا میری

ترے ہاتھ میری فنا بقا ترے ہاتھ میری سزا جزا

مجھے ناز ہے کہ ترے سوا کوئی اور میرا خدا نہیں

لیکن اس کو اثر خدا جانے

نہ ہوا ہوگا یا ہوا ہوگا

خدایا خیر کرنا نبض بیمار محبت کی

کئی دن سے بہت برہم مزاج ناتوانی ہے

مرا ایک سجدہ تو ہو چین کا

خدا ہی جو ٹھہرا خود آ جائے نا

کوئی ہے مومن کوئی ہے ترسا خدا کی باتیں خدا ہی جانے

عجب طرح کا ہے یہ تماشہ خدا کی باتیں خدا ہی جانے

آ پھنسوں میں بتوں کے دام میں یوں

دردؔ یہ بھی خدا کی قدرت ہے

دوئی جا کے رنگ صفا رہ گیا

خودی مٹتے مٹتے خدا رہ گیا

ڈھونڈھے اسرار خدا دل نے جو اندھا بن کر

رہ گیا آپ ہی پہلو میں معمہ بن کر

خدا کا شکر ہے پیاسے کو دریا یاد کرتا ہے

مسافر نے فراہم کر لیا ہے کوچ کا ساماں

کوئی دنیا میں نہیں آیا ہمیشہ کے لیے

بس خدا کا نام ہی نام خدا رہ جائے گا

دل دیا جان دی خدا تو نے

تیرا احسان ایک ہو تو کہوں

جس پہ تیری نظر نہیں ہوتی

اس کی جانب خدا نہیں ہوتا

خدا حافظ اب دل کی خود داریوں کا وہ آتے نہیں ان کو لانا پڑےگا

محبت سے مجبور ہوں، کیا بتاؤں انہیں کیسے کیسے منانا پڑےگا

علی تو کو جانوں خدا تو کو جانوں

میں رکھتی ہوں جگ سے طبیعت نیاری

خدا جانے کیا ہوگا انجام اس کا

میں بے صبر اتنا ہوں وہ تند خو ہے

ان کو بت سمجھا تھا یا ان کو خدا سمجھا تھا میں

ہاں بتا دے اے جبین شوق کیا سمجھا تھا میں

کسی بت کی ادا نے مار ڈالا

بہانے سے خدا نے مار ڈالا

آپ معشوق کیا ہو گئے

عاشقوں کے خدا ہو گئے

ان بتوں کے لیے خدا نہ کرے

دین و دل یوں کوئی بھی کھوتا ہے

دین و ایماں کیا اور کیا ہے دھرم کھول دیا اب تو نام خدا نے بھرم

چشم مرشد نے کی ایسی جادوگری کچھ بھی مجھ کو نہ بھائے تو میں کیا کروں

ہمیں خدا کے سوا کچھ نظر نہیں آتا

نکل گئے ہیں بہت دور جستجو کرتے

یا خدا اکبرؔ کی کشتی کو نکال

تو ہی اس بیڑے کا کھیون ہار ہے

جنون عشق کی نیرنگیاں ارے توبہ

کبھی خدا ہوں کبھی بندۂ خدا ہوں میں

ترے کوچے کی ہو جائے تو اچھا

خدا جانے یہ مٹی ہے کہاں کی

بے خودی گر ہو خود تو آ کے ملے

اے خدا بے خودی عجب شے ہے

خدا بھی جب نہ ہو معلوم تب جانو مٹی ہستی

فنا کا کیا مزا جب تک خدا معلوم ہوتا ہے

دیکھا جو اس صنم کو تو محسوس یہ ہوا

جلوہ خدا کا صورت انسان ہو گیا

قناعت دوسرے کے آسرے کا نام ہے مضطرؔ

خدا ہے جو کوئی حد توکل سے نکل آیا

ہے لطف زندگی کا بعد از فنا اسی میں

نام خدا جو اپنے سب تن بدن سے نکلے

مردان خدا جو ہیں وہ ہیں عارف باللہ

تفریق نہیں میں ہے کہ کچھ پیر و جواں میں

خدا جانے مری مٹی ٹھکانے کب لگے مضطرؔ

بہت دن سے جنازہ کوچۂ قاتل میں رکھا ہے

فرشتے کیوں ستاتے ہیں لحد میں

خدا مالک ہے جو چاہے سزا دے

چلو آؤ کاوشؔ کہ کاندھا لگائیں

علی کی خدا نے اٹھائی ہے ڈولی

بہ روز حشر حاکم قادر مطلق خدا ہوگا

فرشتوں کے لکھے اور شیخ کی باتوں سے کیا ہوگا

تمہارا درد ہے سرمایۂ حیات مرا

خدا کرے کہ یہ ہو لا دوا غریب نواز

جب خدا سے لو لگائی جائے گی

پھر دعا کب کوئی خالی جائے گی