āshiq hazāroñ sūrat-e-parvāna gir paḌe

ulTī naqāb ruḳh se jo mahfil meñ yaar ne

aashiq hazaron surat-e-parwana gir paDe

ulTi naqab ruKH se jo mahfil mein yar ne

dil kā aalam āshiqī meñ kyā kahūñ kyā ho gayā

rañj sahte sahte patthar kā kaleja ho gayā

dil ka aalam aashiqi mein kya kahun kya ho gaya

ranj sahte sahte patthar ka kaleja ho gaya

qatl kuchh āshiq hue maqtal meñ us ke haath se

kuchh phire māyūs aur shauq-e-shahādat le chale

qatl kuchh aashiq hue maqtal mein us ke hath se

kuchh phire mayus aur shauq-e-shahadat le chale

āshiqoñ ko phir qazā aa.ī qayāmat ho ga.ī

phir samand-e-nāz ko us turk ne jaulāñ kiyā

aashiqon ko phir qaza aai qayamat ho gai

phir samand-e-naz ko us turk ne jaulan kiya

'aughat' jahāñ meñ ab dil-o-dīñ pūchhtā hai kaun

āshiq kā in butoñ meñ koī qadar-dāñ nahīñ

'aughat' jahan mein ab dil-o-din puchhta hai kaun

aashiq ka in buton mein koi qadar-dan nahin

vo rahe āñkhoñ meñ merī maiñ na dekhūñ ġhair ko

ye hamāre aur un ke ahd-o-paimāñ ho gayā

wo rahe aankhon mein meri main na dekhun ghair ko

ye hamare aur un ke ahd-o-paiman ho gaya

butoñ kā ishq huā jab nasīb vaa.iz

ki muddatoñ kiyā pahle ḳhudā ḳhudā ham ne

buton ka ishq hua jab nasib waiz

ki muddaton kiya pahle KHuda KHuda hum ne

gir paḌe ġhash khā ke āshiq aur murde jī uThe

do-qadam jab vo chale ye hashr barpā ho gayā

gir paDe ghash kha ke aashiq aur murde ji uThe

do-qadam jab wo chale ye hashr barpa ho gaya

ye bolā dekh kar ā.īna mujh se vo merā ḳhud-bīñ

kaho ḳhush-rū jahāñ meñ aur haiñ mere muqābil ke

ye bola dekh kar aaina mujh se wo mera KHud-bin

kaho KHush-ru jahan mein aur hain mere muqabil ke

kareñ āh-o-fuġhāñ phoḌeñ-phaphole is tarah dil ke

irāda hai ki ro.eñ iid ke din bhī gale mil ke

karen aah-o-fughan phoDen-phaphole is tarah dil ke

irada hai ki roen id ke din bhi gale mil ke

kareñ āh-o-fuġhāñ phoḌeñ-phaphole is tarah dil ke

irāda hai ki ro.eñ iid ke din bhī gale mil ke

karen aah-o-fughan phoDen-phaphole is tarah dil ke

irada hai ki roen id ke din bhi gale mil ke

tujhe dekh o but-e-ḳhush-adā phirī aañkh saarī ḳhudā.ī se

vo jo yaad rahtī thī sūrateñ unheñ saaf dil se bhulā diyā

tujhe dekh o but-e-KHush-ada phiri aankh sari KHudai se

wo jo yaad rahti thi suraten unhen saf dil se bhula diya

rain añdherī baaT na samjhī taak meñ haiñ har baar

'aughat' dharm ye rākhnā guru kareñ nistār

rain andheri baT na samjhi tak mein hain har bar

'aughat' dharm ye rakhna guru karen nistar

kū-e-jānāñ bhī na chhoḌā ḳhāna-vīrānī ke ba.ad

dekhnā hai ab kahāñ ye āsmāñ le jā.egā

ku-e-jaanan bhi na chhoDa KHana-virani ke baad

dekhna hai ab kahan ye aasman le jaega