خیرآباد کے ادبی چمن کی آبیاری کرنے والے اور اس میں طرح طرح کے گل اور بولے کھلانے والے علامہ فضل حق خیرآبادی کے خاندان کو یہ شرف حاصل ہے کہ خیرآباد کی سب سے پہلی خاتون شاعرہ آپ کے خاندان سے ہوئیں، حرماں خیرآبادی کا نام سعیدالنسا تھا، آپ علامہ فضل حق خیرآبادی کی صاحبزادی اور مضطر خیرآبادی کی والدۂ گرامی تھیں، آپ بڑی عالمہ اور فاضلہ تھیں، آپ اچھی شاعرہ تھیں، آپ اردو، فارسی کے علاوہ ہندی زبان کی بہترین جانکار تھیں اور تینوں زبان میں شاعری کرتی تھی، آپ کی علمی لیاقت کا حال یہ تھا کہ آپ کے بھائی مولانا عبدالحق کو یہ کہنا پڑا کہ ’’اچھا ہوا سعیدالنسا بہن ہوئی، بھائی نہ ہوئیں ورنہ ان کے سامنے ہمیں کون پوچھتا‘‘ باغیٔ ہندوستان کے مصنف عبدالشاہد شروانی نے آپ کا کچھ نمونۂ کلام اپنی کتاب میں دیا ہے۔