عبداللطیف شوق جو ادبی دنیا میں شوقؔ نیپالی کے نام سے معروف تھے، 1938ء میں نیپال کے شہر نیپال گنج میں پیدا ہوئے، نامساعد حالات کے باعث وہ صرف ثانوی درجے تک ہی رسمی تعلیم حاصل کر سکے، تاہم ذوقِ ادب اور شغفِ شاعری نے انہیں علمی و ادبی میدان میں ایک نمایاں مقام عطا کیا، انہوں نے ضلع بہرائچ کے معروف اور مستند استاد واصف القادری نانپاروی کی شاگردی اختیار کی، شوق نیپالی بنیادی طور پر غزل کے شاعر تھے لیکن نعت گوئی میں بھی انہیں خاص ملکہ حاصل تھا، ان کے کلام میں عشقِ رسول ﷺ، عقیدت و وارفتگی اور سوز و گداز کی کیفیت نمایاں طور پر جلوہ گر ہوتی ہے، زبان کی سادگی، جذبات کی صداقت اور اسلوب کی شائستگی ان کی شاعری کا امتیاز ہے، ان کا نعتیہ مجموعہ متاعِ شوق کے نام سے شائع ہوا جسے اہلِ ذوق میں قدر و احترام کی نگاہ سے دیکھا گیا۔