جارج فان توم ان ممتاز غیر مسلم شعرا میں شمار ہوتے ہیں جنہوں نے اردو اور فارسی شاعری میں اپنی علمی استعداد، لسانی مہارت اور فنی ذوق کے ذریعے ایک نمایاں مقام حاصل کیا، وہ 1808ء میں کپتان برنارڈ فان توم کے گھر پیدا ہوئے، اگرچہ ان کا تعلق ایک یورپی خانوادے سے تھا، تاہم مشرقی علوم بالخصوص اردو اور فارسی زبان و ادب سے ان کی غیر معمولی وابستگی نے انہیں برصغیر کی ادبی روایت کا ایک معتبر نام بنا دیا، ابتدائی تعلیم کے بعد انہوں نے فارسی، عربی اور فنِ عروض کی باقاعدہ تحصیل کی، انہوں نے فارسی اور اردو دونوں زبانوں میں شعر کہے، شاعری میں انہوں نے "صاحب" اور "جرجیس" دونوں تخلص اختیار کیے، اگرچہ ان کی بنیادی شناخت ایک غزل گو شاعر کی ہے، تاہم ان کا مجموعی شعری سرمایہ اردو اور فارسی دونوں زبانوں کی مشترکہ ادبی روایت کا ایک اہم حصہ تصور کیا جاتا ہے، 2 جنوری 1879ء کو ان کا انتقال ہوا، انہیں بریلی کالج، بریلی کے احاطے میں سپردِ خاک کیا گیا۔