امام محمد باقر اہلِ بیتِ اطہار کے پانچویں امام، امام زین العابدین کے فرزند اور امام حسین کے پوتے تھے، آپ کی ولادت 57 ہجری میں مدینہ منورہ میں ہوئی، آپ کی والدہ حضرت فاطمہ بنتِ امام حسن تھیں، اس طرح آپ کو یہ منفرد اعزاز حاصل ہے کہ آپ کا نسب دونوں جانب سے حضرت محمد رسول اللہ کے خاندانِ مبارک سے جا ملتا ہے، آپ کا لقب "باقر العلوم" تھا کیوں کہ آپ نے علم و حکمت کے پوشیدہ اسرار کو نمایاں کیا اور دینی علوم کو نئی وسعت عطا کی، آپ اپنے عہد کے ممتاز عالم، مفسر، محدث اور فقیہ تھے، جن کی علمی مجالس سے بے شمار علما نے فیض حاصل کیا، عبادت، تقویٰ، حلم اور اخلاقِ حسنہ آپ کی شخصیت کے نمایاں اوصاف تھے، سیاسی کشمکش کے دور میں بھی آپ نے علم، فکر اور اصلاحِ معاشرہ کو اپنی زندگی کا محور بنایا، آپ کے فرزند امام جعفر صادق نے بھی آپ کے علمی مشن کو آگے بڑھایا اور علومِ اہلِ بیت کو مزید فروغ دیا، آپ کا وصال 114 ہجری میں مدینہ منورہ میں ہوا اور جنت البقیع میں سپردِ خاک ہوئے، آپ کی زندگی علم، کردار اور روحانی بصیرت کی ایسی روشن مثال ہے جس کی روشنی آج بھی اہلِ علم کے لیے مشعلِ راہ ہے۔