دھنپت رائے تھاپر جو ادبی دنیا میں راز لائل پوری کے نام سے معروف ہیں، 14 جولائی 1920ء کو لائل پور کے ایک متمول خاندان میں شری جے آر تھاپر کے گھر پیدا ہوئے، وہ مجاہدِ آزادی دیوان چندر تھاپر کے برادرِ خورد تھے، ابتدائی تعلیم اپنے آبائی شہر میں حاصل کی اور میٹرک تک تعلیم مکمل کرنے کے بعد اردو میں ادیب کا امتحان بھی کامیابی سے پاس کیا، تقسیمِ ہند کے بعد 1947ء میں وہ دہلی منتقل ہوگئے جہاں انہوں نے اپنی علمی اور ادبی سرگرمیوں کا ازسرِ نو آغاز کیا، شاعری کے ابتدائی دور میں انہیں سرشار سیلانی کی سرپرستی حاصل رہی، ان کے انتقال کے بعد انہوں نے ساحر ہوشیار پوری سے اصلاح لی جس سے ان کے شعری ذوق میں مزید نکھار پیدا ہوا، ان کی پہلی تصنیف "نورِ صداقت" 1979ء میں ہندی رسم الخط میں شائع ہوئی، اس کے بعد ان کے دو شعری مجموعے "آئینۂ راز" اور "راز و نیاز" منظرِ عام پر آئے، جبکہ ان کا چوتھا شعری مجموعہ "کائناتِ راز" 1989ء میں شائع ہوا، انہوں نے غزل، نظم اور نعت سمیت مختلف اصنافِ سخن میں طبع آزمائی کی، ان کے نعتیہ کلام میں حضور اکرم سے والہانہ محبت، عقیدت اور روحانی وابستگی کا نہایت خوب صورت اظہار ملتا ہے۔