رفیق مغل عہدِ حاضر کے ان سنجیدہ اور باوقار شعرا میں شمار ہوتے ہیں جو گیسوئے شعر و سخن کو سنوارنے میں ہمہ وقت مصروفِ عمل رہتے ہیں، ان کی شاعری میں فنی شعور کے ساتھ ساتھ ایک گہری فکری بصیرت بھی کار فرما نظر آتی ہے، جس کے باعث ان کا کلام محض لفظوں کا مجموعہ نہیں بلکہ ایک با معنی تخلیقی اظہار بن جاتا ہے، خصوصاً نعتیہ شاعری میں رفیق مغل کا مقام قابلِ توجہ ہے، ان کی نعتیں عشق و محبتِ رسول سے سرشار ہوتی ہیں، جن میں عقیدت کی سچائی اور جذبے کی پاکیزگی نمایاں طور پر جھلکتی ہے، وہ نہایت خلوص اور وارفتگی کے ساتھ حضرت رسول اللہ کی بارگاہ میں نذرانۂ عقیدت پیش کرتے ہیں، جس کے باعث ان کا کلام دلوں کو متاثر کرنے کی بھرپور صلاحیت رکھتا ہے، ان کے یہاں تصنع یا بناوٹ کے بجائے سادگی اور تاثیر کا عنصر غالب رہتا ہے، رفیق مغل کو مذہب سے گہرا لگاؤ حاصل ہے اور یہی وابستگی ان کی شاعری میں بھی واضح طور پر محسوس ہوتی ہے، ان کا طرزِ فکر متوازن اور مثبت ہے، جس میں اخلاقی اقدار اور روحانی احساسات کو خاص اہمیت دی گئی ہے۔