نعت گوئی کے حوالے سے طاہر سلطانی کا نام کسی تعارف کا محتاج نہیں، وہ اردو نعتیہ ادب کے ان معتبر اور سنجیدہ شعرا میں شمار ہوتے ہیں جنہوں نے اپنی پوری ادبی زندگی کو حمد و نعت کے مقدس اور روحانی فن کے لیے وقف کر دیا، ان کی شعری کائنات کا مرکز و محور عشقِ رسول، دینی عقیدت، روحانی واردات اور اسلامی اقدار کی ترجمانی ہے جس کی وجہ سے ان کے کلام میں ایک خاص تقدس، سوز و اثر اور داخلی روشنی محسوس ہوتی ہے، طاہر سلطانی نے نہ صرف خود نعت گوئی کو اپنی تخلیقی پہچان بنایا بلکہ انہوں نے اپنے فکری اور ادبی اثرات کے ذریعے بے شمار افراد میں نعتیہ شاعری کا ذوق اور جذبہ بھی پیدا کیا، ان کی صحبت، رہنمائی اور ادبی کاوشوں نے متعدد نو آموز شعرا کو اس مقدس صنفِ سخن کی طرف متوجہ کیا، جس کے نتیجے میں نعت گوئی کے دائرے میں ایک قابلِ قدر اضافہ ہوا، ان کے متعدد حمد و نعت کے مجموعے منظرِ عام پر آ چکے ہیں، جنہوں نے ادبی حلقوں اور مذہبی ذوق رکھنے والے قارئین میں خاصی پذیرائی حاصل کی۔