بدھراج ظفر کا تعلق ایک معزز ٹھاکر خاندان سے تھا، وہ 13 اگست 1927ء کو مظفر گڑھ کے علی پور میں پیدا ہوئے، ابھی ان کی تعلیم کا سلسلہ مڈل تک ہی پہنچا تھا کہ حالات نے کروٹ لی اور وہ ہجرت کرکے بھارت کے شہر سونی پت میں آ بسے، اگرچہ رسمی تعلیم کا سفر زیادہ طویل نہ ہوسکا، تاہم ذوقِ مطالعہ اور شوقِ شعر و سخن نے ان کی فکری زندگی کو ہمیشہ متحرک رکھا، شاعری سے ان کا شغف کم سنی ہی سے تھا اور یہی ذوق آگے چل کر ان کی ادبی شناخت کا بنیادی حوالہ بن گیا، بدھراج ظفر نے اپنے شعری ذوق کی آبیاری کے لیے غلام حسین رئیس نیازی اور دیوی دیال آتش بہاول پوری سے اصلاحِ سخن حاصل کی، ان کی شعری کاوشوں کا مجموعہ ’’گلستانِ معرفت‘‘ کے نام سے موسوم ہے، جس کے عنوان ہی سے ان کے کلام کے روحانی اور صوفیانہ مزاج کا اندازہ ہوتا ہے، روحانیت سے انہیں گہری وابستگی تھی، بدھراج ظفر کے شعری سرمایے میں نعتیہ کلام کو بھی نمایاں مقام حاصل ہے، انہوں نے محبت و عقیدت کے جذبے سے سرشار ہو کر کثرت سے نعتیں کہیں ہیں۔