اہلِ خانہ تمہاری رعیت ہیں، قیامت کے روز ان کی نسبت تم سے پرستش ہوگی۔

جن اعمال سے تقربِ خداوندی حاصل کیا جاتا ہے وہ یا تو فرائض ہیں یا نوافل، نوافل کی فرائض کے مقابلہ میں کوئی حیثیت نہیں، اپنے وقت پر کسی فرض کی ادائیگی ایک ہزار سال کے نوافل سے بہتر ہے، اگر چہ وہ نیت خالص کے ساتھ ادا کئے جائیں۔

شریعت تمام دنیوی و اخروی سعادتوں کی ضامن ہے، کوئی مطلوب ایسا نہیں کہ اس کی تکمیل کے لیے شریعت کے علاوہ کسی اور چیز کی احتیاج واقع ہو، طریقت و حقیقت جو صوفیہ کا ما بہ الامتیاز ہے، دونوں شریعت کے خادم اور خلاص کے حصول میں معاون ہیں، اس طرح طریقت و حقیقت کے حصول کا مقصد محض شریعت کو اس کی اصل روح کے ساتھ عمل میں لانے کا ذریعہ ہے نہ کہ کوئی اور بات جو شریعت کے دائرے سے خارج ہو۔

کام کا مدار دل پر ہے، اگر دل حق تعالیٰ کے غیر سے گرفتار ہے تو خراب اور ابتر ہے، صرف ظاہری اعمال اور رسمی عبادتوں سے کچھ نہیں ہوسکتا۔

یہ کس قدر بڑی نعمت ہے کہ خدا اپنے بندوں کو جوانی میں توبہ کی توفیق عطا فرمائے اور اس پر استقامت بخشے۔