نام محمد عثمان اور تخلص عارف رکھتے تھے، آپ کا تعلق طریقتِ نقشبندیہ سے تھا، 15 اپریل 1923 کو بیکانیر، راجستھان میں پیدا ہوئے۔
محمد عثمان عارف نے اپنی ابتدائی تعلیم ڈونگر کالج، بیکانیر میں حاصل کی، اعلیٰ تعلیم کے لیے آگرہ یونیورسٹی کا رخ کیا جہاں سے بی اے کی ڈگری حاصل کی، بعد ازاں علی گڑھ مسلم یونیورسٹی سے ایم اے اور ایل ایل بی کی ڈگریاں حاصل کیں۔
محمد عثمان عارف نہ صرف ایک قادرالکلام شاعر تھے بلکہ ادبی و تنظیمی سرگرمیوں میں بھی پیش پیش رہے، انجمن ترقی اردو کی بیکانیر شاخ کے جنرل سکریٹری کی حیثیت سے انہوں نے اردو زبان و ادب کی ترویج و اشاعت میں نمایاں کردار ادا کیا، ان کی قیادت میں بیکانیر میں اردو کے کئی علمی و ادبی پروگرام منعقد ہوئے، جنہوں نے مقامی سطح پر اردو زبان کے فروغ میں نئی روح پھونکی۔
عارف نقشبندی کی شاعری روحانی، مذہبی اور قومی جذبات سے لبریز ہے، ان کا رجحان دینی شاعری، خصوصاً حمد و نعت کی طرف زیادہ رہا، ان کی شاعری میں عشقِ رسول، روحانیت، حب الوطنی اور اخلاقی اقدار کی جھلک ملتی ہے۔
محمد عثمان عارف کی ادبی خدمات کو ان کی مندرجہ ذیل تصانیف میں نذر وطن، نورِ زندگی، ذکرِ محبوب اور عقیدت کے پھول قابل ذکر ہیں۔