دیا شنکر "بحر موجی" کی پیدائش 9 ستمبر 1911ء کو داؤد گنج، علی گنج، ایٹہ میں ہوئی، ان کے والد کا نام بابو بھگوتی پرشاد تھا، وہ کائستھ برادری کی سکسینہ شاخ سے تعلق رکھتے تھے، اپنے استاد موج صدیقی سے گہری عقیدت کے باعث انہوں نے اپنے تخلص کے ساتھ ان کی نسبت قائم رکھتے ہوئے خود کو "بحر موجی" کے نام سے متعارف کرایا، ابتدائی زندگی کے بعد انہوں نے اپنا آبائی وطن ترک کر کے جھانسی میں سکونت اختیار کی، جہاں 1933ء تک قیام کے دوران انٹرمیڈیٹ کی تعلیم مکمل کی، بعد ازاں کانپور منتقل ہوئے اور کرائسٹ چرچ کالج سے بی اے کی ڈگری حاصل کی، تعلیم سے فراغت کے بعد وہیں ملازمت اختیار کر لی اور اپنی عملی زندگی کا آغاز کیا، انہوں نے 1931ء میں باقاعدہ شاعری کا آغاز کیا، ان کی ادبی خدمات کے اعتراف میں اتر پردیش اردو اکادمی، لکھنؤ کی جانب سے انہیں وظیفہ بھی عطا کیا گیا، بحر موجی نے مختلف اصنافِ سخن میں طبع آزمائی کی، تاہم نعت گوئی سے بھی انہیں خصوصی شغف تھا۔