امام جعفر صادق علم، حکمت اور اخلاقِ عالیہ کی ان تابندہ شخصیات میں شمار ہوتے ہیں جنہوں نے اسلامی فکر اور انسانی شعور کو گہرے اثرات عطا کیے، آپ امام محمد باقر کے فرزند، امام زین العابدین کے پوتے اور امام حسین کے پڑپوتے تھے، آپ کی ولادت 17 ربیع الاول 80 ہجری موافق 702ء میں مدینہ منورہ میں ہوئی جہاں علم و معرفت کے ماحول میں آپ کی پرورش ہوئی، آپ نے اپنے والد سے علومِ دین، تفسیر، حدیث اور فقہ کی گہری تعلیم حاصل کی اور بعد ازاں ایک عظیم علمی مکتب کی بنیاد رکھی، آپ کے درس سے بے شمار علما نے فیض پایا جن میں امام ابو حنیفہ اور امام مالک جیسے جلیل القدر نام بھی شامل ہیں، آپ کی شخصیت صرف مذہبی رہنمائی تک محدود نہ تھی بلکہ صداقت، حلم، بردباری اور فکری آزادی کی روشن مثال تھی، سیاسی ہنگاموں کے دور میں بھی آپ نے علم اور اخلاق کے چراغ کو روشن رکھا اور معاشرے کی فکری تعمیر کو اپنی زندگی کا مقصد بنایا، فقہِ جعفریہ کی نسبت بھی آپ ہی کی طرف منسوب ہے جو آپ کی علمی عظمت کی ایک نمایاں دلیل ہے، 148 ہجری موافق 765ء میں مدینہ منورہ میں آپ کا وصال ہوا اور جنت البقیع میں مدفون ہوئے، آپ آج بھی علم، بصیرت اور کردار کی ایسی درخشاں علامت ہیں جن کی فکر زمانوں کے لیے رہنمائی کا سرچشمہ بنی ہوئی ہے۔