جگدیش مہتہ دردؔ اردو ادب کی ان ممتاز شخصیات میں شمار ہوتے ہیں جنہوں نے اپنی علمی بصیرت، ادبی ذوق اور تخلیقی صلاحیتوں کے ذریعے اہلِ ادب میں ایک منفرد مقام حاصل کیا، ان کا آبائی وطن ساہووالہ، سیالکوٹ تھا جو تقسیمِ ہند سے قبل علمی و تہذیبی اعتبار سے ایک اہم خطہ سمجھا جاتا تھا، وہ 1918ء میں اسی سرزمین پر پیدا ہوئے اور ابتدائی زندگی وہیں بسر کی، تقسیمِ ہند کے ہنگامہ خیز اور المناک حالات نے انہیں بھی لاکھوں دوسرے باشندگانِ برصغیر کی طرح ہجرت پر مجبور کر دیا، ترکِ وطن کے بعد انہوں نے دہلی کو اپنا مستقل مسکن بنایا، جہاں انہوں نے نہ صرف اپنی عملی زندگی کو ازسرِ نو استوار کیا بلکہ ادبی و ثقافتی سرگرمیوں میں بھی بھرپور حصہ لیا، بعد ازاں انہیں کینیڈا میں بھی قیام کا موقع ملا، جہاں رہتے ہوئے انہوں نے اردو زبان و ادب سے اپنی وابستگی کو برقرار رکھا اور دیارِ غیر میں اردو کی ترویج و اشاعت کے لیے خدمات انجام دیں، جگدیش مہتہ کو شاعری کا ذوق اپنے عہد کے نامور شاعر منور لکھنوی کی شاگردی سے جلا ملا، وہ ان کے ممتاز تلامذہ میں شمار ہوتے تھے، ادبی خدمات کے میدان میں وہ ماہنامہ ’’حقیقت بیانی‘‘ کے سرپرست بھی رہے۔