مولوی جلال الدین احمد خاں ولد حاجی رحیم الدین خاں محلہ بنگلہ آزاد خاں رامپور کے معزز باشندوں میں شمار ہوتے تھے، آپ کی ولادت 25 شوال 1245ھ کو رامپور میں ہوئی، ابتدائی تعلیم کے بعد آپ نے فارسی زبان و ادب کی اعلیٰ تعلیم مولوی خلیفہ غیاث الدین عزت (مصنفِ ’’غیاث اللغات‘‘) اور شیخ احمد علی رامپوری سے حاصل کی، جبکہ عربی اور دیگر علوم کی تحصیل رامپور کے ممتاز علما سے کی، تعلیم سے فراغت کے بعد آپ نے مختلف مقامات پر ملازمت اختیار کی اور اپنی دیانت، فہم و فراست اور وقار کے باعث ہر جگہ قدر و منزلت کی نگاہ سے دیکھے گئے، آپ نہایت باوقار، کم گو اور صاحبِ فہم شخصیت تھے، عربی و فارسی پر آپ کو اعلیٰ درجہ کی دسترس حاصل تھی اور عبادات، خصوصاً صوم و صلوٰۃ کی پابندی میں مثالی حیثیت رکھتے تھے، آپ فارسی اور اردو دونوں زبانوں میں تصنیف و تالیف کرتے تھے، کچھ عرصہ جے پور سے بھی آپ کا تعلق رہا، تاہم بعد میں دوبارہ رامپور میں قیام پذیر ہوگئے، روحانی طور پر آپ حضرت شاہ سعید احمد مجددی دہلوی کے دستِ ارادت پر بیعت تھے۔
آپ کا انتقال 11 شعبان 1313ھ کو ہوا اور آپ کو شاہ ولی اللہ کے مزار کے احاطے میں سپردِ خاک کیا گیا، ’’تذکرۂ کاملانِ رامپور‘‘ میں آپ کا تخلص جلال درج ہے، تاہم آپ کے اردو و فارسی کلام میں جلالی ہی مستعمل ملتا ہے۔