جمیل قادری کی پیدائش بریلی میں ہوئی، آپ نے ابتدائی تعلیم اپنے والد حاجی عبدالرحمٰن چشتی نظامی سے حاصل کی، جن کی تربیت اور علمی فیضان نے آپ کی شخصیت کی تشکیل میں بنیادی کردار ادا کیا، بعد ازاں آپ نے بریلی کی معروف درس گاہ مدرسہ منظرِ اسلام میں باقاعدہ علمی تعلیم حاصل کی اور علومِ دینیہ میں مہارت حاصل کی، جمیل قادری ایک بلند پایہ نعت گو شاعر، خوش بیان واعظ اور صاحبِ طرز مصنف تھے، آپ کو سلسلۂ طریقت میں بیعت و خلافت کا شرف مولانا احمد رضا خاں بریلوی سے حاصل ہوا، اس کے علاوہ آپ نے حسن رضا خاں بریلوی کے سامنے زانوئے تلمذ بھی تہہ کیا اور ان سے علمی و ادبی فیض حاصل کیا، مولانا احمد رضا خاں نے آپ کی نعتیہ خدمات اور عشقِ رسول سے سرشار شاعری کے اعتراف میں آپ کو "مداح الحبیب" کے خطاب سے نوازا، آپ نے اپنی شاعری اور نثر کے ذریعے دینی، ادبی اور روحانی اقدار کی ترجمانی کی اور اپنے عہد میں ایک ممتاز مقام حاصل کیا، آپ کا وصال 1924ء مطابق 1343ھ میں ہوا۔