مولانا عبدالماجد ولد مولانا عبدالقیوم، محلہ مولوی ٹولہ، بدایوں کے ساکن اور خاندانِ عثمانی سے تعلق رکھتے تھے، آپ کی ولادت 4 شعبان 1304ھ مطابق 28 اپریل 1887ء کو ہوئی، آپ کی پرورش مولانا عبدالقادر بدایونی کے سایۂ عاطفت میں ہوئی، رسمِ تسمیہ خوانی کے بعد آپ نے مولانا عبدالمجید قادری آنولوی اور مفتی شاہ محمد ابراہیم قادری سے ابتدائی تعلیم حاصل کی، بعد ازاں درسِ نظامی کی تکمیل مولانا محب احمد قادری کے زیرِ نگرانی کی، اس دوران آپ مولانا عبدالقادر بدایونی اور اپنے والد ماجد سے بھی مستفید ہوتے رہے، 1320ھ تا 1402ھ کے عرصے میں آپ کی علمی تکمیل ہوئی اور اسی زمانے میں آپ کا نکاح مولانا ابرارالحق کی صاحبزادی سے ہوا، طب کی تعلیم آپ نے دہلی کے نامور اطبا حکیم غلام رضا خان اور حکیم عبدالرشید خان سے حاصل کی، طالبِ علمی کے زمانے ہی میں آپ مولانا عبدالمقتدر قادری سے بیعت ہوئے اور خلافت سے بھی سرفراز کیے گئے، آپ کو بچپن ہی سے شاعری کا شوق تھا، تاہم آپ کے استاد کے حوالے سے کوئی مستند معلومات دستیاب نہیں، ایک عرصے تک آپ درگاہ قادریہ میں عرس کے موقع پر مناقب خوانی کی ایک باقاعدہ مجلس کا اہتمام کرتے رہے، جو آپ کی دینی و روحانی وابستگی کا مظہر ہے، آپ کی علمی و ادبی تصانیف میں عورت اور قرآن، خلاصۃ العقائد، المکتوب، افضل الخطاب، اعلانِ حق، خطباتِ عربیہ (جمعہ و عیدین)، التہدید اور القول السدید شامل ہیں جو آپ کی علمی بصیرت اور دینی خدمات کی غماز ہیں، آپ کا انتقال 3 شعبان 1350ھ کو ہوا۔