منشی نند کشور کا تعلق کائستھ خاندان سے تھا، وہ منشی گنیش رائے کے فرزند اور قصبہ بسواں، سیتاپور کے باشندے تھے، ان کی پیدائش 1856ء میں ہوئی، فارسی میں باقاعدہ تعلیم حاصل کرکے اس زبان میں مہارت پیدا کی اور عملی زندگی میں شعبۂ تعلیم سے وابستہ رہے، وہ بہرائچ کے فائنل اسکول کے صدر مدرس کے منصب پر فائز رہے، شعر و سخن میں انہوں نے کسی باقاعدہ استاد سے تلمذ نہیں کیا، تاہم اپنی فطری استعداد اور مسلسل مشق کے باعث فصیح الکلام اور پُرگو شاعر کی حیثیت سے شہرت پائی، ان کے شعری مزاج میں عقیدت و مذہب کا رنگ بھی نمایاں تھا، وہ نعت گوئی کو اپنے لیے موجبِ برکت سمجھتے تھے اور بارگاہِ رسالت مآب میں نعتیہ نذرانے پیش کرتے رہے، ان کی ادبی کاوشوں میں ’’یوسف زلیخا‘‘ کی اردو منظوم تصنیف بھی شامل ہے جو ان کی شعری قدرت اور فارسی و اردو دونوں زبانوں سے گہری وابستگی کی آئینہ دار ہے۔