ڈاکٹر عبدالصمد نورؔ سہارنپوری عہدِ حاضر کے ان باوقار اور صاحبِ علم و فضل شعرا میں شمار ہوتے ہیں جنہوں نے اپنی علمی استعداد اور ادبی بصیرت کے ذریعے اردو شاعری، بالخصوص نعتیہ ادب میں ایک معتبر مقام حاصل کیا ہے، وہ نہ صرف اعلیٰ تعلیم یافتہ ہیں بلکہ اردو، عربی، اسلامیات اور انگریزی جیسے متنوع مضامین میں گہری دسترس رکھتے ہیں، انہوں نے ایم۔فل اور پی۔ایچ۔ڈی جیسی اعلیٰ تعلیمی ڈگریاں حاصل کر کے اپنے علمی وقار کو مزید مستحکم کیا ہے، جس کا اثر ان کی تحریروں اور شاعری میں واضح طور پر محسوس کیا جا سکتا ہے، ادبی تربیت کے حوالے سے انہیں ممتاز اساتذہ کی شاگردی حاصل رہی ہے، انہوں نے نصیراللہ خاں کوٹی اور اختر علی انجم جیسے کہنہ مشق اور صاحبِ اسلوب شعرا سے اصلاح لی، جس کے باعث ان کے کلام میں فنی پختگی، اسلوبی نکھار اور فکری گہرائی نمایاں طور پر جلوہ گر ہے، ان کے یہاں روایت اور جدت کا ایک متوازن امتزاج پایا جاتا ہے، نور سہارنپوری کی نعتیہ شاعری کا مجموعہ "آبشارِ کرم" ان کے عشقِ رسول، عقیدت اور روحانی وابستگی کا آئینہ دار ہے، اسی طرح ان کا غزلیہ مجموعہ "پیکرِ خیال" ان کی فکری وسعت اور تخلیقی صلاحیتوں کا مظہر ہے۔