شیخ محمد یونس جن کا قلمی نام 'صاحب احمدآبادی' ہے، گجرات کے تاریخی و روحانی شہر احمدآباد سے تعلق رکھتے ہیں، آپ صوفی خانوادے سے وابستہ ہیں اور سلسلۂ چشتیہ، قادریہ، جنیدیہ کے روحانی سلسلوں سے تعلق رکھتے ہیں، روحانیت کا یہ تسلسل آپ کی فکر، احساس اور شاعری میں ایک لطیف چمک کے ساتھ جھلکتا ہے۔

آپ نے  M.Com میں اعلیٰ تعلیم حاصل کی، تاہم دل کی دنیا ادب، خاص طور پر اردو شاعری کی طرف مائل رہی، اردو زبان سے گہری محبت نے آپ کو اس فن پارے کی طرف راغب کیا جہاں لفظ صرف اظہار نہیں بلکہ وجدان اور معرفت کا آئینہ ہوتے ہیں۔

سال 2025 میں آپ کا پہلا غزل مجموعہ "اُس کی آنکھوں میں..." شائع ہوا، جو گجرات اردو ساہتیہ اکیڈمی کی اعانت سے منظرِ عام پر آیا، اس مجموعے کی غزلیں نہ صرف جمالیاتی احساسات کی ترجمان ہیں بلکہ ایک صوفی دل کی گواہی بھی دیتی ہیں جو محبوبِ حقیقی کی تلاش میں ہر حسن کو جلوۂ یار سمجھتا ہے۔