شاہ احمد عبدالحئی کے لائق و قابلِ فخر فرزند شمس الدین ابوالفرح المتخلص بہ طلعت 23 جمادی الثانی 1163ھ کو پیدا ہوئے، ابتدائی تعلیم اپنے چچازاد بھائی شاہ نورالحق تپاں سے حاصل کی، بعد ازاں اپنے جدِ امجد پیر مجیب اللہ کے دستِ حق پرست پر بیعت کی، مرشد نے آپ کو اجازت و خلافت سے بھی سرفراز فرمایا، رشد و ہدایت کی غرض سے کلکتہ تشریف لے گئے جہاں معتقدین کے پُر زور اصرار پر مستقل سکونت اختیار کر لی، 1223ھ میں وہیں وصال فرمایا، آپ کا فارسی دیوان ہنوز زیورِ طباعت سے آراستہ نہیں ہوسکا، اس کا قلمی نسخہ خانقاہ مجیبیہ، پھلواری شریف میں محفوظ ہے، اس دیوان میں تقریباً 740 غزلیں شامل ہیں، اگرچہ اس کا غالب حصہ غزلوں پر مشتمل ہے، تاہم اس میں حمد، نعت، منقبت اور مستزاد بھی شامل ہیں، آپ کے کلام میں بالخصوص حافظ شیرازی کے افکار و اسلوب سے گہری فکری ہم آہنگی نمایاں دکھائی دیتی ہے۔