āñkhoñ āñkhoñ hī meñ khul jaate haiñ lākhoñ asrār

dars-e-ulfat ke liye hājat-e-ustād nahīñ

aankhon aankhon hi mein khul jate hain lakhon asrar

dars-e-ulfat ke liye hajat-e-ustad nahin

agar chāhūñ nizām-e-dahr ko zer-o-zabar kar duuñ

mire jazbāt kā tūfāñ zamīñ se āsmāñ tak hai

agar chahun nizam-e-dahr ko zer-o-zabar kar dun

mere jazbaat ka tufan zamin se aasman tak hai

tere firāq meñ har-vaqt aah kartā huuñ

tere liye javānī tabāh kartā huuñ

tere firaq mein har-waqt aah karta hun

tere liye jawani tabah karta hun

faroġh-e-hasrat-o-ġham se jigar meñ daaġh rakhtā huuñ

mire gulshan kī zīnat daur-e-hañgām-e-ḳhizāñ tak hai

farogh-e-hasrat-o-gham se jigar mein dagh rakhta hun

mere gulshan ki zinat daur-e-hangam-e-KHizan tak hai

baras ḳhudā ke liye mujh par ai sahāb-e-karam

ki terī aas pe phir ik gunāh kartā huuñ

baras KHuda ke liye mujh par ai sahab-e-karam

ki teri aas pe phir ek gunah karta hun

vāqif haiñ rāz-e-ishq se ahl-e-chaman ki gul

sun kar mirā afsāna-e-ġham muskurā diyā

waqif hain raaz-e-ishq se ahl-e-chaman ki gul

sun kar mera afsana-e-gham muskura diya

mujhe aish-o-ġham meñ ġharaz nahīñ agar aarzū hai to hai yahī

ki umañg ban ke chhupā rahe koī dil ke parda-e-rāz meñ

mujhe aish-o-gham mein gharaz nahin agar aarzu hai to hai yahi

ki umang ban ke chhupa rahe koi dil ke parda-e-raaz mein

satātā hai mujhe sayyād zālim is liye shāyad

ki raunaq us ke gulshan kī mire shaġhl-e-fuġhāñ tak hai

satata hai mujhe sayyaad zalim is liye shayad

ki raunaq us ke gulshan ki mere shaghl-e-fughan tak hai

khilne lagī agar koī ummīd kī kalī

barq-e-alam taḌap ke girī aur jalā diyā

khilne lagi agar koi ummid ki kali

barq-e-alam taDap ke giri aur jala diya

log kahte haiñ mohabbat meñ ḳhudā miltā hai

lekin apnī hai ye hālat ki ḳhudā yaad nahīñ

log kahte hain mohabbat mein KHuda milta hai

lekin apni hai ye haalat ki KHuda yaad nahin

gulshan meñ jā ke dāġh-e-jigar jab dikhā diyā

phūloñ ko ham ne paikar-e-hairat banā diyā

gulshan mein ja ke dagh-e-jigar jab dikha diya

phulon ko hum ne paikar-e-hairat bana diya