خلوت طاعت کا وہ سمندر ہے کہ مردانِ خدا کے سینے میں چھپے حقیقت کے موتی اس سمندر کے علاوہ کہیں اور ظاہر نہیں ہوتے لیکن اس کے لیے حضرت محمد رسول اللہ تک سلسلے کا اتصال اور بقدرِ ضرورت علم شریعت لازم ہے۔

درویشی کی کسوٹی اور اس کا معیار کتاب و سنت اور قابلِ اقتدار اسلاف کی سیرتیں ہیں، صرف اجازتوں کا ہونا اور متبرک مقام پر ہونا کافی نہیں کہ فلاں شخص فلاں بزرگ کا فرزند ہے اور فلاں اپنے آبا و اجداد کا جانشیں ہے، اگر وہ اس مقام کے لائق نہ ہوتا تو اس کو جانشینی کا شرف حاصل نہ ہوتا، یہ بات اچھی طرح ذہن نشیں کرلو کہ انسان کا شرف اور اس کی بزرگی زمان و مکان سے نہیں بلکہ تقویٰ سے ہے۔

ذکر وصالِ حق کا سبب اور قلوب کی صفائی کا ذریعہ ہے، اس لیے سالک کو کسی بھی حال میں ذکر سے باز رہنا جائز نہیں ہے۔