بارہویں صدی عیسوی کے نامور سنسکرت شاعر جئے دیو ہندوستانی ادبیات اور بھکتی روایت کی ایک درخشاں شخصیت کے طور پر یاد کیے جاتے ہیں، وہ بنگال کے مشہور فرماں روا لکشمن سین کے دربار کے ان پانچ ممتاز اہلِ علم و فن میں شامل تھے جنہیں دربار کے ’’پانچ جواہرات‘‘ کا اعزاز حاصل تھا، لکشمن سین کی حکومت کا آغاز 1170ء کے لگ بھگ ہوا اور اسی عہد میں جئے دیو کی علمی و ادبی شہرت اپنے عروج پر پہنچی، روایات کے مطابق جئے دیو ایک سیاح اور درویش منش سادھو تھے، دنیاوی علائق اور مادی کششوں سے اس قدر بے نیاز تھے کہ ’’مایا‘‘ کے فریب میں مبتلا ہونے کے اندیشے سے کسی ایک درخت کے سائے تلے ایک دن سے زیادہ قیام نہیں کرتے تھے، ان کی زندگی زہد، ریاضت اور روحانی وارفتگی کی ایک دل آویز داستان معلوم ہوتی ہے جس میں عشقِ الٰہی اور جمالِ حقیقی کی جستجو نمایاں نظر آتی ہے، جئے دیو کی ادبی یادگاروں میں تین تصانیف کو خاص اہمیت حاصل ہے، ’’گیت گووند‘‘، ’’رامنا مادھو‘‘ اور ’’چندرالوک‘‘، ان میں ’’گیت گووند‘‘ کو غیر معمولی شہرت اور مقبولیت حاصل ہوئی، یہ تصنیف دراصل رادھا اور کرشن کے عشقِ روحانی کی ایک مسحور کن شعری داستان ہے جس میں عشق، جمال، موسیقیت اور تصوف باہم اس طرح آمیز ہوگئے ہیں کہ یہ کتاب ہندوستانی ادب کا ایک لازوال شاہکار بن گئی ہے، ’’گیت گووند‘‘ نہ صرف سنسکرت شاعری کے اعلیٰ ترین نمونوں میں شمار ہوتی ہے بلکہ اس نے ہندوستان کی موسیقی، رقص، مصوری اور بھکتی تحریک پر بھی گہرے اور دیرپا اثرات مرتب کیے ہیں، یہی وجہ ہے کہ جئے دیو کا نام آج بھی ہندوستانی تہذیب و ثقافت کے افق پر ایک تابندہ ستارے کی مانند روشن ہے۔