جو لوگ خدا کے آگے گردنِ تسلیم و رضا خم کئے ہوئے ہیں وہ مصیبت و بلا کو بلا کی صورت میں نہیں دیکھ سکتے۔

توکل کے یہ معنی نہیں کہ ترکِ اسباب کر کے بیٹھ جائے، یہ خود بے ادبی ہے لیکن کتابت وغیرہ کا کوئی سبب یعنی پیشہ مقرر کر لے، سبب پر نظر رکھنی چاہیے، سبب کو مثل دروازہ کے خیال کرنا چاہیے کہ خدا نے واسطے حصولِ سبب کے مقرر کیا ہے۔

دوامِ مراقبہ بڑی دولت ہے کہ اس سے دلوں میں قبولیت پیدا ہوتی ہے اور دلوں میں قبولیت پیدا ہونی خدا کی قبولیت کی نشانی ہے۔

صبر لذاتِ نفس سے نکل جانے اور مرغوب و محبوب اشیا سے باز رہنے کو کہتے ہیں۔

قناعت فضول چیزوں سے نکل جانے اور بقدرِ حاجت پر اکتفا کرنے اور کھانے پینے اور رہنے کی چیزوں میں اسراف سے پرہیز کو کہتے ہیں۔