ہر شئے اپنے مرکز کی طرف لوٹتی ہے، اگر چہ وہ کتنا ہی بلند کیوں نہ ہو جائے۔

لوگوں سے ان کی سمجھ کے مطابق گفتگو کرنی چاہیے۔

ریاضت و مجاہدہ ہی ظہورِ کشف و کرامات کے باعث ہیں لیکن راہِ خدا محنت و مشقت سے خالی نہیں، اس راستہ میں قدم مردانہ وار رکھنا چاہیے۔

نادانوں اور کم ظرفوں کے حال پر رحم کرنا چاہیے، ایسوں کے ساتھ مہربانی کرنی، معصیت کو دعوت دینی ہے۔

خدا نے حضرت آدم کی اولاد کو عبادت اور مخالفتِ نفس کے لیے پیدا فرمایا ہے، اس لیے طالب کو معشوقِ حقیقی کے عشق و طلب کے سوا کسی طرف متوجہ نہ ہونا چاہیے۔

دستِ سوال پھیلانا ایک ذلیل کام ہے، چاہے باپ کے ساتھ ہی کیوں نہ ہو۔

بغیر اکتسابِ علوم قرآن و حدیث راہِ طریقت کے اہم کاموں میں دخل دینا بدعت ہے اور ایسی خودی انسان کو چاہِ ضلالت میں گرا دیتی ہے۔

اگر چہ مرنے کے بعد روح عبادت کے لیے مکلف نہیں ہے مگر اس لیے قبروں پر مجلسِ سرود کا ہونا اور وہاں عام عورتوں کا جانا درست نہیں۔