jise dekhā yahāñ hairān dekhā

ye kaisā ā.īna-ḳhāna banāyā

jise dekha yahan hairan dekha

ye kaisa aaina-KHana banaya

jab talak merī ḳhudī baaqī rahī sab kuchh thā

rah gayā phir to faqat nām-e-ḳhudā mere baa'd

jab talak meri KHudi baqi rahi sab kuchh tha

rah gaya phir to faqat nam-e-KHuda mere ba'd

jaan dī bulbuloñ ne jab gul par

tab vo gulzār meñ nazar aayā

jaan di bulbulon ne jab gul par

tab wo gulzar mein nazar aaya

aap dekhā us ne apne aap ko

ham ko ā.īna banāyā yaar ne

aap dekha us ne apne aap ko

hum ko aaina banaya yar ne

miT jaa.e apnī hastī-e-mauhūm ġham hai kyā

ho dil ko tirā ġham koī ho ho na ho na ho

miT jae apni hasti-e-mauhum gham hai kya

ho dil ko tera gham koi ho ho na ho na ho

DhūñDhe asrār-e-ḳhudā dil ne jo andhā ban kar

rah gayā aap hī pahlū meñ mu'amma ban kar

DhunDhe asrar-e-KHuda dil ne jo andha ban kar

rah gaya aap hi pahlu mein mu'amma ban kar

kashtī meñ dariyā dariyā meñ kashtī siflī meñ ’ulvī ’ulvī meñ siflī

tūfāñ meñ maujeñ maujoñ meñ yam hai jaane so dekhe dekhe so samjhe

kashti mein dariya dariya mein kashti sifli mein ’ulwi ’ulwi mein sifli

tufan mein maujen maujon mein yam hai jaane so dekhe dekhe so samjhe

gah yaar banā gaah banā sūrat-e-aġhyār

apnā hī banā ā.īna apnā hī parastār

gah yar bana gah bana surat-e-aghyar

apna hi bana aaina apna hi parastar

har aañkh kī til meñ hai ḳhudā.ī kā tamāsha

har ġhuncha meñ gulshan hai har ik zarra meñ sahrā

har aankh ki til mein hai KHudai ka tamasha

har ghuncha mein gulshan hai har ek zarra mein sahra

mujh se avval na thā kuchh dahr meñ juz zāt-e-ḳhudā

ġhair-e-haq dekhā to phir kuchh na rahā mere baa'd

mujh se awwal na tha kuchh dahr mein juz zat-e-KHuda

ghair-e-haq dekha to phir kuchh na raha mere ba'd

pilā.e ḳhum pe ḳhum ehsān dekho

mujhe saaqī ne ḳhum-ḳhāna banāyā

pilae KHum pe KHum ehsan dekho

mujhe saqi ne KHum-KHana banaya