جو لوگ خدا کے آگے گردنِ تسلیم و رضا خم کئے ہوئے ہیں وہ مصیبت و بلا کو بلا کی صورت میں نہیں دیکھ سکتے۔

اؤلیائے کبائر سے محفوظ تو ہوتے ہیں لیکن اگر کوئی کبیرہ ان سے ناگاہ سرزد ہو جائے تو ان کے تمام اقوال کو باطل قرار دینا جہالت کی بات ہے، یہ دیکھنا چاہیے کہ بحیثیت مجموعی ان کا اکثری عمل کیا رہا ہے، اگر کبھی بحکم بشریت کوئی بات ان سے صادر ہوگئی ہو تو ان کو اس میں معذور قرار دینا چاہیے۔

اعتقاد درست، رعایت احکام شریعت، اخلاص اور دوام توجہ بجناب حق عظیم ترین نعمت ہے، اس نعمتِ عظمیٰ کے برابر کوئی ذوق و وجدان نہیں۔

اگر کوئی سالک مقامِ معصیت میں پھنسا ہوا ہے یا دنیا کی طرف اس کی رغبت ہے اس کا سبب ان چند اسباب میں سے کوئی ایک ضرور ہوگا۔

(۱) وہ ضرورت کے مطابق معاش پر اکتفا نہ کرتا ہوا۔

(۲) عوام سے اختلاط رکھتا ہے۔

(۳) اس کے اوقات ذکر حق سے معمور نہیں ہیں۔

(۴) خدا سے غیر خدا کا طالب ہے۔

(۵) وہ اپنے نفس سے مجاہدہ نہیں کرتا۔

(۶) وہ اپنے اوپر اور اپنے احوال اور اپنی قوت پر نظر رکھتا ہے۔

(۷) احکام ازلیہ پر سرِ تسلیم خم نہیں کیے ہوئے ہے۔

قناعت فضول چیزوں سے نکل جانے اور بقدرِ حاجت پر اکتفا کرنے اور کھانے پینے اور رہنے کی چیزوں میں اسراف سے پرہیز کو کہتے ہیں۔