dafn huuñ ehsās kī sadiyoñ purānī qabr meñ

zindagī ik zaḳhm hai aur zaḳhm bhī taaza nahīñ

dafn hun ehsas ki sadiyon purani qabr mein

zindagi ek zaKHm hai aur zaKHm bhi taza nahin

saayā koī maiñ apne hī paikar se nikālūñ

tanhā.ī batā kaise tujhe ghar se nikālūñ

saya koi main apne hi paikar se nikalun

tanhai bata kaise tujhe ghar se nikalun

apne riste hue zaḳhmoñ pe chhiḌak letā huuñ

raakh jhaḌtī hai jo ehsās ke añgāroñ se

apne riste hue zaKHmon pe chhiDak leta hun

rakh jhaDti hai jo ehsas ke angaron se

karbalā sāmne aatī jo vo lāshe le kar

aañkh to aañkh hai patthar se bhī ristā paanī

karbala samne aati jo wo lashe le kar

aankh to aankh hai patthar se bhi rista pani

majbūr-e-suḳhan kartā hai kyuuñ mujh ko zamāna

lahja mire jazbāt kā iz.hār na kar de

majbur-e-suKHan karta hai kyun mujh ko zamana

lahja mere jazbaat ka izhaar na kar de

ilm vāloñ ko shahādat kā sabaq tū ne diyā

mar ke bhī zinda rahe insāñ ye haq tū ne diyā

ilm walon ko shahadat ka sabaq tu ne diya

mar ke bhi zinda rahe insan ye haq tu ne diya

yuuñ huī ruuh ko mahsūs mohabbat us kī

jaise āġhosh meñ dariyā ke samundar utrā

yun hui ruh ko mahsus mohabbat us ki

jaise aaghosh mein dariya ke samundar utra

juġhrāfi.e ne kaaT diye rāste mire

tārīḳh ko gila hai ki maiñ ghar nahīñ gayā

jughrafie ne kaT diye raste mere

tariKH ko gila hai ki main ghar nahin gaya

vo sitārā jo mire naam se mansūb huā

dīda-e-shab meñ hai ik āḳhirī aañsū kī tarah

wo sitara jo mere nam se mansub hua

dida-e-shab mein hai ek aaKHiri aansu ki tarah

maiñ jalātā rahā tere liye lamhoñ ke charāġh

tū guzartā huā sadiyoñ kī savārī meñ milā

main jalata raha tere liye lamhon ke charagh

tu guzarta hua sadiyon ki sawari mein mila

sunā.ī jā.egī jab tak mujhe sazā-e-suḳhan

sukūt-e-vaqt meñ āvāz bhar chukā hūñgā

sunai jaegi jab tak mujhe saza-e-suKHan

sukut-e-waqt mein aawaz bhar chuka hunga

lagā ke zaḳhm bahāne chalā hai ab aañsū

rukā hai ḳhuun kahīñ paTTiyāñ bhigone se

laga ke zaKHm bahane chala hai ab aansu

ruka hai KHun kahin paTTiyan bhigone se

auroñ ke ḳhayālāt kī lete haiñ talāshī

aur apne garebān meñ jhāñkā nahīñ jaatā

auron ke KHayalat ki lete hain talashi

aur apne gareban mein jhanka nahin jata

maiñ ik aañsū hī sahī huuñ bahut anmol magar

yuuñ na palkoñ se girā kar mujhe miTTī meñ milā

main ek aansu hi sahi hun bahut anmol magar

yun na palkon se gira kar mujhe miTTi mein mila

paḌ gayā parda samā.at par tirī āvāz kā

ek aahaT kitne hañgāmoñ pe haavī ho ga.ī

paD gaya parda samaat par teri aawaz ka

ek aahaT kitne hangamon pe hawi ho gai

aañkh raushan ho to duniyā ke añdhere kyā haiñ

rasta mahtāb ko rātoñ kī siyāhī meñ milā

aankh raushan ho to duniya ke andhere kya hain

rasta mahtab ko raaton ki siyahi mein mila

bhaag niklā thā jo tūfāñ se chhuḌā kar dāman

sar-e-sāhil vahī Duubā huā kashtī meñ milā

bhag nikla tha jo tufan se chhuDa kar daman

sar-e-sahil wahi Duba hua kashti mein mila

us vaqt tak sulagtī rahī us kī aarzū

jab tak dhueñ se saarā badan bhar nahīñ gayā

us waqt tak sulagti rahi us ki aarzu

jab tak dhuen se sara badan bhar nahin gaya

raat ga.e yuuñ dil ko jaane sard havā.eñ aatī haiñ

ik darvesh kī qabr pe jaise raqqāsā.eñ aatī haiñ

raat gae yun dil ko jaane sard hawaen aati hain

ek darwesh ki qabr pe jaise raqqasaen aati hain

ye faisla to bahut ġhair-munsifāna lagā

hamārā sach bhī adālat ko bāġhiyāna lagā

ye faisla to bahut ghair-munsifana laga

hamara sach bhi adalat ko baghiyana laga

baḌe ḳhulūs se māñgī thī raushnī kī duā

baḌhā kuchh aur añdherā charāġh jalne se

baDe KHulus se mangi thi raushni ki dua

baDha kuchh aur andhera charagh jalne se

Duub kar dekh samundar huuñ maiñ āvāzoñ kā

tālib-e-husn-e-samā.at mirā sannāTā hai

Dub kar dekh samundar hun main aawazon ka

talib-e-husn-e-samaat mera sannaTa hai

lagā.ī aag bhī is ehtimām se us ne

hamārā jaltā huā ghar nigār-ḳhāna lagā

lagai aag bhi is ehtimam se us ne

hamara jalta hua ghar nigar-KHana laga

vo lahar huuñ jo pyaas bujhā.e zamīn kī

chamke jo āsmāñ pe vo patthar nahīñ huuñ maiñ

wo lahar hun jo pyas bujhae zamin ki

chamke jo aasman pe wo patthar nahin hun main

duur jā kar mirī āvāz sunī duniyā ne

fan ujāgar mirā ā.īna-e-fardā se huā

dur ja kar meri aawaz suni duniya ne

fan ujagar mera aaina-e-farda se hua

baḌe ḳhulūs se māñgī thī raushnī kī duā

baḌhā kuchh aur añdherā charāġh jalne se

baDe KHulus se mangi thi raushni ki dua

baDha kuchh aur andhera charagh jalne se

jis kī gardan meñ hai phandā vahī insān baḌā

sūliyoñ se yahāñ paimā.ish-e-qad hotī hai

jis ki gardan mein hai phanda wahi insan baDa

suliyon se yahan paimaish-e-qad hoti hai

sāhil kī aarzū nahīñ ta.alīm-e-mustafā

ye naav to rozāna hī mañjdhār se huī

sahil ki aarzu nahin talim-e-mustafa

ye naw to rozana hi manjdhaar se hui

merī har soch ke raste meñ khaḌā hai koī

ā.īna-ḳhāne meñ tanhā.ī kahāñ se aa.e

meri har soch ke raste mein khaDa hai koi

aaina-KHane mein tanhai kahan se aae

paḌ gayā parda samā.at par tirī āvāz kā

ek aahaT kitne hañgāmoñ pe haavī ho ga.ī

paD gaya parda samaat par teri aawaz ka

ek aahaT kitne hangamon pe hawi ho gai

ashkoñ se kahīñ miTtā hai ehsās-e-talavvun

paanī meñ jo ghul jaa.e vo paarā nahīñ hotā

ashkon se kahin miTta hai ehsas-e-talawwun

pani mein jo ghul jae wo para nahin hota

muntazir rahnā bhī kyā chāhat kā ḳhamyāza nahīñ

kaan dastak par lage haiñ ghar kā darvāza nahīñ

muntazir rahna bhi kya chahat ka KHamyaza nahin

kan dastak par lage hain ghar ka darwaza nahin

chhaTegī kaise 'muzaffar' siyāhī qismat kī

nikal to aa.egā ḳhurshīd raat Dhalne se

chhaTegi kaise 'muzaffar' siyahi qismat ki

nikal to aaega KHurshid raat Dhalne se

ye raat kyuuñ na ho afzal tamām rātoñ meñ

liye hue haiñ añdhere charāġh hāthoñ meñ

ye raat kyun na ho afzal tamam raaton mein

liye hue hain andhere charagh hathon mein

patthar mujhe sharminda-e-guftār na kar de

ūñchā mirī āvāz ko dīvār na kar de

patthar mujhe sharminda-e-guftar na kar de

uncha meri aawaz ko diwar na kar de

is bhare shahar meñ kartā huuñ havā se bāteñ

paañv paḌtā hai zamīñ par mirā aahū kī tarah

is bhare shahar mein karta hun hawa se baaten

panw paDta hai zamin par mera aahu ki tarah

DhūñDne niklā thā āvāzoñ kī bastī meñ use

soch kar vīrāñ guzargāhoñ pe baiThā rah gayā

DhunDne nikla tha aawazon ki basti mein use

soch kar viran guzargahon pe baiTha rah gaya

kāhkashāñ ke ḳhvāb 'muzaffar' dekh rahā thā

aur bedārī ret ke Tiile par le aa.ī

kahkashan ke KHwab 'muzaffar' dekh raha tha

aur bedari ret ke Tile par le aai

dafn huuñ ehsās kī sadiyoñ purānī qabr meñ

zindagī ik zaḳhm hai aur zaḳhm bhī taaza nahīñ

dafn hun ehsas ki sadiyon purani qabr mein

zindagi ek zaKHm hai aur zaKHm bhi taza nahin

merī āvāz ḳhamoshī ne mujhe lauTā dī

mujh meñ ab jur.at-e-goyā.ī kahāñ se aa.e

meri aawaz KHamoshi ne mujhe lauTa di

mujh mein ab jurat-e-goyai kahan se aae

ham ne ye tahzīb parindoñ se sīkhī hai

sub.h ko ghar se jaanā shaam ko ghar aa jaanā

hum ne ye tahzib parindon se sikhi hai

subh ko ghar se jaana sham ko ghar aa jaana

rañg sī shakl milī hai tujhe ḳhushbū sā mizāj

lāla-o-gul kahīñ terā hī sarāpā to nahīñ

rang si shakl mili hai tujhe KHushbu sa mizaj

lala-o-gul kahin tera hi sarapa to nahin

dasht-navardī ke daurān 'muzaffar' sar par dhuup rahī

jab se kashtī meñ baiThe haiñ roz ghaTā.eñ aatī haiñ

dasht-nawardi ke dauran 'muzaffar' sar par dhup rahi

jab se kashti mein baiThe hain roz ghaTaen aati hain

yā rahmatallil .ālamīn

āīña-e-rahmat badan sāñseñ charāġh-e-’ilm-o-fan

ya rahmatallil aalamin

aaina-e-rahmat badan sansen charagh-e-’ilm-o-fan

maiñ apne ghar meñ huuñ ghar se ga.e huoñ kī tarah

mire hī sāmne hotā hai tazkira merā

main apne ghar mein hun ghar se gae huon ki tarah

mere hi samne hota hai tazkira mera

sāñsoñ kī oT le ke chalā huuñ charāġh-e-dil

siine meñ jo nahīñ vo ghuTan rāste meñ hai

sanson ki oT le ke chala hun charagh-e-dil

sine mein jo nahin wo ghuTan raste mein hai